Hello Dosto, Iss article main hum WHO ki Air Pollution ki report ko analyze karengey, kaafi saare important facts hai jin per main roshni daalunga aur jaane ki koshish karengey ki India ki haal ki Air Pollution ki situation kya hai aur hum log isse kaise improve kar saktey hai.

WHO-air-pollution-report-hinglish-posts


Basics

Recently WHO matlab World Health Organisation ke Global Urban Air Pollution Database ke dwaara ek report release kari gayi aur uss report main duniya bhar ke Air Pollution ki kya situation hai aur kis city main kitna Air Pollution hai iske baare main kaafi saari jaankari WHO ne apni report main di.

Toh guys pehley main aapko WHO ko baare main thora bata du WHO ko established hua tha 7th April 1948 ko aur iska headquarter hai Switzerland ke Geneva sehar main.

What is the WHO Air Pollution Report

Ab iss report ko banaya kaise gaya tha yeh jaan letey hai aur iska criteria kya tha.

Air pollution kitna hai yeh jaane ke liye sahara liya gaya Particulate Matter (PM10 and PM2.5) ka toh iske level kitna hai ussi ke base per Air Pollution ko measure kiya gaya aur pata lagaya gaya ki kis sehar main rehna sab se zyaada dangerous hai.

Toh iss report main, main focus kiya gaya the PM2.5 per ab PM2.5 per iss liye sab se zyaada focus kiya gaya the kyoun ki yeh jo level hai yeh sab se zyaada ghaatak hai baccho ke liye, aur jo senior citizen hai un ke liye.

Accha ab main aapko bata du ki PM2.5 main kon kon si pollutant cheeze include hoti hai, toh iss main include hota hai Sulfate, Nitrate aur Black Carbon ab yeh saari cheeze bahut zyaada had tak insaano ki health ke liye bahut bad risk hai.

Chalieyh iss PM10 and PM2.5 ko aur acche se smajhtey hai.

What is Particulate Matter is All About?

Jaise maine uper aapko kaha ki PM ka full form hai Particulate Matter, lekin iska matlab hota hai ki Air main kitne particles hai, toh jaha bhi aapko smog dikhta hai woh chotey chotey particulate ko lekar hi banta hai.

Ab jo PM2.5 hai woh 2.5 micrometers hai, diameter main ya phir yeh human hair ke diameter ka sirf 3 percent hai, yeh particles aapko naked eyes se nahi dikhengey iske liye aapko microscope ka use karna hoga.

Toh PM10 jo hai PM2.5 se bada hota hai, aur aap keh saktey hai ki PM2.5 PM10 ke ander aata hai toh yeh sab measurement hai, toh yaha baat yeh aati hai ki PM2.5 itna ghaatak kyoun hai? dekhiyeh jitna particle chota hoga utna woh zyaada lungs ko damage karega, toh jo senior citizen aur bacche hotey hai unke lungs kamzor hotey hai, toh PM2.5 dhire dhire lungs main jama hota rehta hai, toh yeh bahut hi zyaada damage kar sakta hai lungs ko.

Toh iss cheez ko criteria banaya gaya Air Pollution ko measure karne ke liye. Toh jis sehar main PM2.5 ke level paaye gaye hai uss sehar ki Air Quality ko ghaatak maana gaya hai.

I hope ab aapko samaj main aa gaya hoga ki Particulate Matter hota kya hai

NOTE

Dekhiye Particulate Matter ko measure karne ke liye aapke paas kaafi acche pollution forecast bhi hone chaiyeh, aur ek baat main aapko yaha bata du India ke pass itne advance tool abhi nahi hai, toh recently hi India ne US aur Finland ke saath tie up kiya hai aur in dono desho ke saath India ek naya Pollution Forecast develop karega.

Toh India main Air Pollution kaise measure kiya jaata hai?

Toh abhi filhaal toh India ke pass hai SAFAR iski full form hai System of Air Quality and Weather Forecasting and Research, yaha per main aapko batana chaaunga ki US aur Finland se jo naya system aayga woh SAFAR ko replace nahi karega, SAFAR bhi rahega aur saath main jo naya system aayga usse bhi kaam kiya jaayga.

What is the Case with India?

Toh as an India mujhe yeh report dekh ker bahut dukh hua ki India ki Air Pollution ki haalat aise ho gayi hai, aur isse lag raha hai ki agar isse improve nahi kiya gaya toh aane waali generation ka future khatre main hai.

Toh yeh jaan ker aapko heraani hogi ki WHO ne 15 aise sehar ki list banaayi jaha PM2.5 hai Air main, toh us main se 14 toh India ke hi sehar they. Yeh 14 sehar Northern India ke hai.

Aur Northern India main bhi aise sehar jaha aapko lagta hoga ki yaha ka pollution kaafi kam hoga, yaha ki Air quality kaafi acchi hogi for example, Jodhpur, Gaya, Patna, Muzaffarpur yaha per vehicle bahut kam chaltey hai toh pollution kam hona chaiyeh, lekin WHO ki report ke mutaabiq inn seharo main PM2.5 ki Air Quality paayi gayi.

Toh inn seharo ki Air Quality kharaab hui kyoun? 

Toh dekhiyeh WHO ki report main identify kiya gaya Indo-Gangetic Plain ko toh iss area main jo bhi sehar hai waha ka Air Pollution zyaada hai.



Toh jaise aap map main dekh rahe Indo-Gangetic Plain areas jo red color main hai, waha waha Air Pollution zyaada hai.

Indo-Gangetic Plain ka issue hai kya aur kyoun iske wajah se Air Quality kharaba ho rahi hai?

Gangetic Plain areas ek bahut badi valley hai jo dono jagha se trapped hai, jaise humne map main dekha ki ek side Himalaya hai aur dusri side hai South.

Toh iski wajah se hotha yeh hai ki jo bhi Air Pollution hota hai ya phir kahi aur se aata hai toh yaha aakar yeh phas jaata hai, toh yeh area poori tahra se locked hai.

Dursa yaha Waste Management ka bahut bada issue hai jo bhi sehar Indo-Gangetic Plain area main hai unka Waste Management bahut zyaada kharaab hai.

Aur Wind Direction bhi bada issue hai, jaise maine pehley kaha ki dusri jagha se Air pollution jo aata hai woh Indo-Gangetic Plain main aakar phas jaata hai, kyoun ki Air unki taraf zyaada jaa rahi hoti hai.

Toh yeh sab reason hai jo bhi Indo-Gangetic Plain ke ander shear aatey hai aur is liye Air Quality kharaab hui hai.

Lekin Indian ke liye ek acchi baat yeh hai ki poori report main sirf India ka criticism nahi hua hai kuch taarif bhi ki gayi hai.

WHO Praise India

Iss report main India ki Pradhan Mantri Ujjwala Yojna scheme ki tarif ki gayi hai, iss scheme main 37 million aurto ko jo bahut zyaada gareeb hai unko LPG provide kiya gaya hai.

Iss scheme ki wajah se jo Indoor pollution tha woh kam hua hai, kyoun ki hota kya tha ki yeh log khaana banaane ke liye fire wood ka ishtemal kartey they cow dung ka ishtemaal kartey they jisse dhua create hota tha aur ghar main jo buzurg log aur baccho ki sehat per kaafi kharaab asara hota tha, toh waha per yeh Pradhan Mantri Ujjwala Yojna ne kaafi accha kaam kiya hai.

South India ka koi bhi sehar kyoun nahi aaya report main?

Iska ek simple aur basic jawab hai Population, Northern India ke muqaable South India main zyaada population nahi hai population ki wajah se kaafi saare issues aatey hai, aapko gaadi ki zaroorat padhti hai, aapko aur zyaada fossils fuel burn karne padtey hai toh main reason yeh population hi hai.

Dusra South India ki government ne municipality ko aisa role diya gaya jo Air Pollution ko kam karne main kaam karey.

Key Facts

Toh WHO ke database ke mutaabiq Air Pollution se poori duniya main death hui hai 4.2 million aur jo ghar main khaana pakaya jaata hai fire wood aur cow dung per jiske wajah se Indoor Pollution hota hai uski wajah se death hui hai 3.8 million, toh hume yaha se pata chalta hai ki India ki government ne kyoun itna focus kiya hai LPG per.

Aur iss report main yeh bhi kaha gaya ki 9 out of 10 log aise Air main jee rahe hai jaha per high level of pollution hai.

Recently China ne Air Pollution kaafi kam kiya hai, aur inka sab se bada initiative yeh raha hai ki inhone green energy per focus kiya hai aur electric vehicle ko China main promote kiya gaya hai, aur China ki government ne logo ko yeh bhi kaha hai ki agar woh Electric vehicle lengey toh unko kaafi saare incentive milengey.

Iske alaava jab aap power plant main koyle ko burn kartey ho electricity produce karne ke liye toh waha per bhi kaafi maatra main Co2 immersion create hota hai jo global warming ke liye bhi kharaab hai aur aaspaas ke jo ghar hai uske liye bhi kharaab hai toh China ne kya kiya hai ki power plant main aise system laga diye hai ki jo pollution hai usse woh filter kar lete hai atmosphere main jaane se pehely hi.

India main bhi iss per kaam chal raha hai aur i think aane waale 3-4 saal main humaare coal base plant main yeh system aa jaayga.

Toh umeed ki jaa sakti hai aane waqt main India main yeh pollution kuch had tak kam hoga government kaafi saare initiative le rahi hai Air pollution ko kam karne ke liye.

Lekin main reason jo hota hai Air Pollution ka woh hota hai Aabadi, toh aabadi humaari rapidly bhadh rahi hai, logo ki spending power bhad rahi hai spending power bhadegi toh log gaadi lengey toh uski wajah se jo pollution create hoga toh Air pollution toh increase hoga hi.

Toh khair hope for the best.

I hope aapko yeh article accha laga hoga dosto aise hi interesting aur detailed article main apni website per likhta rehta hu meri website ka naam hai www.hinglishposts.com aap meri website visit karey waha per aapko kaafi acche acche article padhne ko milegey.

Aap meri website ke Facebook ke icon ko click kar mere page ko follow kar saktey hai ya phri aap Instagram per bhi follow kar saktey hai.

Thank You.