Hello Dosto, Aaj hum baat karengey ek young entrepreneur ki Ritesh Agarwal ki. Ho sakta hai aap main se kuch logo ne inka naam na suna ho lekin main aapko bata du yeh hai OYO Rooms ke founder and CEO. Inhone hotels ko bada hi affordable bana diya hai, India main toh OYO top per hai lekin China main top 5 main aa gayi hai yeh company aur World main top 10 main aa chuki hai yeh company.

oyo rooms owner


Aur yaha per kamaal ki baat yeh hai ki yeh sirf 25 saal ke hai aur 6500 crore ke maalik hai. Hum sabhi youngster ke liye ek behtarin example hai aur inse aaj hume kaafi kuch sikhne ko milega.

OYO aaj poori duniya main hai toh isse pata chal jaata hai ki kitni zabardast strategy aur mehant rahi hogi Ritesh Agarwal ki, toh yeh biography un logo ke liye kaaafi helpful hone waali hai jo young hai aur apna khud ka business karne ka soch rahe hai.


Early Life


Ritesh Agarwal ka janam Orissa main hua tha, 16th November 1993 ko Orissa ke Rayagada district main inka janam hua tha, aur yeh 4 bhai behan hai, inki family waise toh business background ki hai inke father businessman hai lekin iske baawajud bhi financial condition inki acchi nahi thi.

Middle class family se Ritesh Agarwal belong kartey hai, toh ek typical middle class family ki soch yahi hoti hai ki, ladka hai toh chalo isko padhaayngey doctor, engineer ban jaaye toh accha ya phir koi sarkari naukri mil jaaye toh phir toh bahut hi accha, aur iske baad iski shaadi ho jaaye aur iske bacche ho jaaye toh sab khush life khatam, toh yeh ek typical middle class family ki thinking hoti hai apne baccho ko lekar.

Lekin kuch logo ke sapne aise hotey hai ki woh society se lad jaatey hai aur sapne toh wahi hotey hai jo sone nahi detey. Ritesh ke sapne kuch aise hi they.

Jab Ritesh Agarwal 4th standard main they tab inhone entrepreneur word suna, ab inki badi behan engineer ki padhaai tab kar rahi thi toh usne Ritesh se kaha ki humaari college main entrepreneur fest hai toh tab Ritesh Agarwal ne yeh word suna. Ab inko yeh word bada accha lag gaya lekin iska matlab inhe nahi pata tha.

Aur jab 4th standard main they tabhi inhone soch liye ki main toh entrepreneur hi banuga, inko kuch pata nahi tha ki entrepreneur hota kya hai bus word accha laga toh yehi banna hai.

9th class main jab Ritesh Agarwal gaye toh teacher ne sab se poocha ki baccho tum kya banna chaatey ho? toh koi kehta tha IS, Engineer, Doctor, Ritesh Agarwal entrepreneur boltey they ki mujhe entrepreneur banna hai.

Toh parents ko chor ker inke ghar main sab engineer they, toh kahi na kahi ek force piche se diya jaa raha tha Ritesh ko bhi, ki tumhe bhi Engineer hi banna hai, toh engineer toh Ritesh ko banna nahi tha lekin phir bhi jo ek inki family main tradition ban gaya tha engineering ko lekar toh engineering ki padhaai toh karni hi thi.

Toh Ritesh Agarwal 12th ki padhaai ke baad Kota (Rajasthan) chale gaye, ab Kota main coaching center hai engineering ke, ab Kota main aake woh weekends per Delhi jaatey they, Delhi main entrepreneur ki meetups hotey they summit hoti thi, toh weekend per Delhi aaker summit ko dekhtey they.

Aur waha jaaker woh observe kartey they jo bade bade entrepreneur hai unko, woh kaise baat-cheet kartey hai, kapdey kis tahra ke pehntey hai unki strategy kya hai apne business ko lekar toh woh gaur se suntey they aur dekhtey they.

Toh woh weekends per Delhi aatey they aur phir waapas Kota jaatey they, aur iss dauran woh apni engineering ki padhaai bhi kartey they aur exam bhi detey they. Lekin mann main kahi na kahi tha ki apna business khud ka business shuru karna hai.

Aage Ritesh bataate hai ki jab main Kota se apni family ko milne ke liye jaata tha, toh inki family aur yeh ghumne ke liye nikal jaatey they, lekin kisi bhi family ka sab pehla aur bada problem hota hai Hotel, toh hotel dhundna bahut zaroori hai.

Toh Ritesh Agarwal bhi jab travel kartey they toh unki iss problem ka andaaza tha, tab inke dimag main ek idea aaya ki iss hotel sector main kuch na kuch karna padega, kuch aisa karna padega jisse yeh Hotel ke room book jo hai aasani se ho jaaye aur kisi tahra ka koi problem na ho. Normally kya hota hai dosto ki jab bhi hum ghumne jaatey hai toh hume waha per ek accha hotel chaiyeh, phir room bhi acche hone chaiyeh aur sasta bhi hona chaiyeh lekin itni saari facility hum ek hi hotel main nahi dhund saktey, toh yeh ek problem zaroor tha. Aur Ritesh bhi isse waakef they.

Ritesh Agarwal First Company Oraval


Ab isi dauran Ritesh ne ek choti si company bana li Oraval, company banaane main koi zyaada waqt lagta nahi hai aap apne dost ke saath milker paise invest kar ke company khol saketey hai lekin usse chalana woh sab se badi baat hoti hai.

Yaha per main aapko ek aur baat Ritesh se related bata du ki Ritesh ka dimag bahut powerful hai, inhone coding bahut kam umar main sikh li thi C++, Java yeh sab choti si umar main inhone sikh liya tha. Sirf 8 saal ke they tab unhe acche se computer chalana bhi aa gaya tha.

Toh sirf 17 saal ki umar main inhone apni company kholi Orval Stays Pvt Ltd. jo ki abhi OYO Rooms ho gaya hai. Toh yeh company inhone apne college time per launch ki thi.

Aur yaha per main aapko ek aur baat bata du ki Ritesh Agarwal college drop-out hai.

Lekin inhone college kyoun chora iske piche ek story hai, actually inhon ek movie dekhi thi The Social Network. Yeh movie Mark Zuckerberg per banaayi gayi thi, unki zindagi per banaayi gayi thi, toh jab inhone yeh movie dekhi tab inka mind poora change ho gaya. Iss movie main ek scene hai jaha Peter Thiel woh Mark Zuckerberg ko $1000 ka check deta hai  aur kehtey hai ki aap apni company start karo hum aapko fund dengey. Toh inhe bhi aisa laga ki agar mujhe koi check de de toh meri bhi company kaafi chalegi.

Yaha per kamaal ki baat yeh hai ki exactly Ritesh Agarwal ke saath iss movie ke scene jaisa hi hua.

Ritesh Applied for Thiel Fellowship


Ritesh Agarwal ne 2013 main apply kiya tha "Thiel Fellowship" ke liye aur Ritesh Agarwal pehley Asian they jo iss fellowship ke liye select huey. Iss fellowship ko apply karne ke liye sab se pheley aapki umar 20 saal se kam honi chaiyeh aur iss program main judne ke baad aapko  $100,000 milengey.

Lekin iss fellowship ko lene ke liye aapko aapka college chorna padega, Ritesh ne yeh baat apni family se bataai aur family ne bhi Ritesh ko support kiya. Aur phir Ritesh ne college chor diya.

Aur uss waqt iss fellowship ke liye sirf 20 log select huey they un main se ek Ritesh Agarwal bhi they, aur jab Ritesh ne iss fellowship ko attend kiya toh kamaal hi ho gaya kyoun ki paise bhi miley aur inka jo vision tha woh bhi change ho gaya. Inka vision aur bada ho gaya, business ko woh aur zyaada expand karna chaatey they.

Ab Orval Stays jo ki Ritesh Agarwal ki company hai usne 2013 ke aaspass ghar lease per lena shuru kar diya, hota kya tha ki logo ne property toh bana li hai bade bade makaan bana liye hai, lekin woh makaan aise hi pade hai iske piche motive yahi hota hai ki ek accha makaan bana lo aur jab koi accha kahridaar aaye toh bech dengey.

Ab Ritesh Agarwal ne isi ka faayda uthaaya, Ritesh Agarwal ne in gharo ko lease per lena shuru kar diya toh makaano ko le liya, rooms ko le liya, aur jab Ritesh makaan ko lease per letey they toh woh makaanmaalik ko yeh kehtey they ki "App mujhe 6 months ke liye makaan kiraaye per dijye main aapko 6 months main accha profit earn kar ke dunga yeh lijye $100,000"

Lekin yaha per main aapko ek baat bata du ki Ritesh ki umar uss waqt bahut kam thi woh sirf 17 saal ke they, toh jab makaan maalik unko dekhtey they toh unko lagta tha ki yeh kaise deal karega?

Toh iss tahar se Ritesh ne Makaano ko Rooms ko lease per lena shuru kiya, aur aaj aapko Hotel se zyaad aapko makaan milengey House stay milega, kisi makaan main aap chale jaaiye aur makaan per OYO likha hua hai toh matlab waha per rooms diye jaatey hai. Toh Ritesh ne isse jo bhi paise kamaaye usse Oravel main hi laga diya.

Ritesh Agarwal as Leader


Toh yeh pehla project tha aur pehla project kaafi successful hua aur iske chaltey hi ab log saamne se inhe phone kartey they aur kehtey they ki mera makaan aise hi pada hai aap lease per le lo.

Lekin jab business expand hua toh problem hona shuru ho gayi kyoun ki kya hota hai ki jab bhi aapka business expand hota hai toh aapko team ki zaroorat padhti hai aur pehelye 5 project ke dauran toh Ritesh Agarwal ke pass team toh thi nahi sirf 3-4 log they bus wohi team thi.

Aur staff ki na bahut badi problem hoti hai, ek toh accha staff aasani se milta nahi hai aur agar koi accha mil bhi jaata hai toh woh zyaada salary ki maang karta hai toh uss waqt Ritesh ke pass itna paisa toh tha nahi.

Aur aisa bhi nahi hai ki Ritesh ke pass bilkul staff nahi tha, staff tha lekin hota yeh tha ki 1 month kaam kartey they phir bhaag jaatey they, aur pehley 5 project main toh sab Ritesh hi sab kartey they makaan ki saaf safai, furniture ko change karna kyoun ki jo ghar miltey they woh bahut hi kharaab haalat main miltey they toh sab kuch Ritesh ko hi karna padta tha.

Ritesh Agarwal ke idea bahut accha tha is liye inhe saamne se phone aatey they makaanmaalik ke ki humaara ghar lease pe le lo toh is liye inko apna business expand karna pada aur isi dauran inhe Thiel Fellowship mil gayi aur $100,000 inko miley aur yeh sarae ke saare paise inhone Oravel main laga diye.

Aur yaha se inhone ek acchi team bana li, Ritesh Agar boltey hai ki agar aapko business main successful hona hai toh sab se pehley toh aapko quality maintain karni padegi aapko customer friendly rehna padega lekin dusri aur sab se important cheez aapko aapke staff ko lekar chalna padega aur aapke jo partners hai unko toh lekar chalna hi padega.

Normally hota kya hai ki jab do partners kaam kartey hai toh conflict of ideas toh hotey hi hai Ritesh ne aur unke partner ke bich mutual understating hai ki jo bhi rahega sirf room tak hi rahega room ke bahar we are friends, kaam ko divide kar diya ki aap planing karo aur jo karna hai woh karo strategy banaao implement main karunga aur paise ka bhi sab main hi dekhunga. Aur Ritesh aur unke partners in dono ne hi ek dusre ke kaam main taang nahi adaai.

OYO ROOMS


Phir Oravel 2013 main OYO Rooms ho gaya. Ab jab OYO shuru hua tab inke pass 100-200 logo ka staff tha aur accha staff tha. Ab yaha per Ritesh ki strategy yeh thi ki jo first 30 employee aaye they jo ki bahut hi padhe likhe they toh unse Ritesh ne kaha ki aap ki nazar main jo best log hai unhe le ke aao, toh unhone acche logo ko laaya toh shuru main OYO ki recruitment reference base per hui thi.

Aur aaj toh OYO poorey India main phela hua hai, OYO ka matlab hota hai "On Your Own" aur aaj OYO ko 6 saal ho gaye hai aur 6 saal main OYO ne bulandiyoun ko chu liya hai.

India main OYO number 1 hai largest room chain hai inki India main aur China main TOP 5 main aati hai OYO darsal ulta hota hai China ki company India main aaker successful hoti hai lekin ek Indian company China main successful hai, aur world main 3rd place per aati hai agar room chain ki baat kartey toh, toh aap samaj saktey hai ki OYO kitne saare room own karti hai.

Yaha per ek baat hume samjhni hogi ki OYO itne kam waqt main itna successful hua kaise? Dekhiyeh sab se pehley toh yeh ideal kamaal ka tha aur unique tha, dusra Ritesh ne quality maintain kar ke rakkhi, room service ko accha rakkha aur staff ko khush rakkha taaki staff aur accha kaam karey toh jab yeh sab factors milengey toh business toh successful hoga hi.

OYO abhi 80 countries main 800 cities main hai iss main bade bade desh aatey hai jaise United States, China, Europe, Britain, India, Malaysia, Middle East, Indonesia, Philippines aur Japan.

Iss time Ritesh Agarwal ka net worth 2,600 crore hai waise toh har saal inka yeh figure double ho jaata hai aur OYO Rooms bhi bhadtey jaa rahe hai.

Ab hum toh yahi chaatey hai ki isi tahar ke entrepreneur aaye aur dhamaal macchaye, toh aap dekh rahe hai na ki, na koi college ki degree, na koi paisa sab akele dum per inhone kiya aur ek aise company khol li jo aaj poori duniya main hai.

Toh yeh kar saktey hai toh hum bhi kar saktey hai. I hope aapko yeh article pasand aaya hoga.

Thank You.